Psa 24 | NdeIBE | STEP | Ihubo likaDavida Umhlaba ungokaJehova, lakho konke okukuwo, ilizwe labo bonke abahlala kulo;

Psalms 24

1 Umhlaba ungokaJehova, lakho konke okukuwo, ilizwe labo bonke abahlala kulo;

2 ngokuba wenza isisekelo sawo phezu kwezilwandle wawumisa phezu kwamanzi.

3 Ngubani ongaqansa intaba kaJehova na? ngubani ongema endaweni yakhe engcwele na?

4 Ngulowo olezandla ezihlanzekileyo lenhliziyo emhlophe, ongaphakamiseli umphefumulo wakhe esithombeni loba afunge ngenkohliso.

5 Uzakwamkela isibusiso kuJehova lokukhululwa kuNkulunkulu uMsindisi wakhe.

6 Sinjalo isizukulwane salabo abamdingayo, abadinga ubuso bakho, O Nkulunkulu kaJakhobe.

7 Phakamisani izihloko zenu, lina masango; phakamani, lina minyango yekadeni, ukuba uJehova wenkazimulo angene.

8 Ngubani lowo onguJehova wenkazimulo? NguJehova oqinileyo olamandla, uJehova olamandla empini.

9 Phakamisani izihloko zenu, lina masango; ziphakamiseni, lina minyango yekadeni, ukuba uJehova wenkazimulo angene.

10 Ungubani na lowoJehova wenkazimulo? NguJehova uSomandla – nguye uJehova wenkazimulo.